Mark 15

Naŋgi Yesus osi gilsib Pailat aqa baŋq di ateb

1Onaqa nobqolo malu qameqnaq atra tamo kokba ti Juda gate kokba ti dal anjam qalie tamo naŋgi ti kalil koroesosibqa Yesus qalib moiqajqa anjam keretoqneb. Anjam kereonaq naŋgi Yesus aqa baŋ tontetosib osi gilsib Pailat aqa baŋq di ateb. 2Onaqa Pailat na Yesus nenemyej, “Ni Juda naŋgo Mandor Koba e?” Onaqa Yesus na minjej, “Od. Anjam agi ni na maronum di kere.” 3Onaqa atra tamo kokba naŋgi Yesus aqa anjam di qusib naŋgi minjiŋ oqetnjrnaqa Yesus gisaŋyoqnsib aqa jejamuq di anjam gargekoba qametoqneb. 4Deqa Pailat na olo Yesus minjej, “Naŋgi anjam gargekoba ino jejamuq di qameleŋeqnub. Ni kamba anjam bei marqasai e?” 5Onaqa Yesus a torei mequmej. A anjam bei yala marosai. Deqa Pailat a tulaŋ prugugetej.

Pailat a marej, “Niŋgi na Yesus osib ŋamburbasq di qamiye.”

6Wausau gaigai Juda naŋgo yori bati koba brantoqnimqa Juda tamo qudei naŋgi tonto talq di soqnibqa Juda naŋgi na bei aqa ñam maroqnibqa Pailat na uratoqnim giloqnqas. 7Ariya Juda tamo bei aqa ñam Barabas a tonto talq di atnab soqnej. A nami tamo qudei joqsiqa Rom naŋgi ti qotsib tamo qudei ñumnab moreŋeb. Deqa a ojsib tonto talq di waiyeb. 8Ariya bati di tamo uŋgasari naŋgi Pailat aqa areq gilsibqa a naŋgo yori bati qa kumbra gaigai yoqnej qaji di olo yqajqa minjeb. 9Minjnabqa Pailat na nenemnjrej, “E Juda tamo yai tonto talq dena uratsiy eŋgwai? E nuŋgo Mandor Koba Yesus uratsiy eŋgwai e? Niŋgi na merbiye.” 10Pailat a na naŋgi degsi minjrej? Di kiyaqa? A qalieej, atra tamo kokba naŋgi Yesus qa are tulaŋ minjiŋ oqetnjrnaqa deqa ojsib Pailat aqa baŋq di ateb. 11Onaqa atra tamo kokba naŋgi na tamo uŋgasari kalil naŋgo areqalo tigeltetnjreb. Naŋgi na Pailat minjibqa a na Barabas uratsim enjrsimqa olo Yesus osim qalim moiqajqa deqa naŋgo areqalo tigeltetnjreb. Onaqa naŋgi na Pailat aqa areq gilsib minjeb, “Ni Barabas oqeq atsim ege. Yesus oqeq ataim.” 12Onaqa Pailat na olo minjrej, “Niŋgi na e Barabas eŋgwajqa merbonum. Deqa e Yesus kieryqai? Agi niŋgi a qa mareqnub, ‘A Juda gago Mandor Koba.’ Deqa e a kieryqai?” 13Onaqa naŋgi kalil murqumyosib minjeb, “Ni na ŋamburbasq di qame.” 14Onaqa minjrej, “Kiyaqa Yesus qalit moiqas? A une kie yqo deqa a ŋamburbasq di qamqai?” Degsi minjrnaqa naŋgi olo tulaŋ koba murqumyoqnsib waiŋyoqnsib minjoqneb, “Ni na Yesus ŋamburbasq di qame.” 15Onaqa Pailat a tamo uŋgasari naŋgo are latetnjrqa osiqa naŋgo anjam di dauryosiq Barabas tonto talq dena oqeq atsiqa naŋgi enjrej. Enjrsiqa olo Yesus osiq qaja tamo naŋgo baŋq di atsiqa minjrej, “Niŋgi na Yesus osib bu toqoŋ na kumbaiŋyiye.” Degsi minjrnaqa naŋgi na Yesus osib bu toqoŋ na kumbaiŋyeb. Kumbaiŋysib koboonaqa Pailat na olo minjrej, “Niŋgi na Yesus ŋamburbasq di qamqajqa osib giliye.”

Qaja tamo naŋgi na Yesus misiliŋyosib gisaŋ na a biŋiyeb

16Degsi minjrnaqa naŋgi Yesus baŋ ojsib Rom naŋgo tal kobaqujaq osi gileb. Osi gilsib qaja tamo kalil naŋgi metnjrnab bosib koroeb. Koroosib gara jugo olekoba lent mandor kokba naŋgi gaigai jigeqnub deqaji bei osib Yesus jigeteb. Osib sil luwit osib lulumosib sil dena mandor kokba naŋgo gate tatal bul gereiysib aqa gateq di atetosib siŋgila na teqiyeb. Yesus a segi qa Mandor Koba maroqnej deqa naŋgi na kumbra degyeb. 18Osib Yesus misiliŋyosib gisaŋ na biŋiyosib minjoqneb, “O Juda naŋgo Mandor Koba, kaiye!” 19Degsib Yesus minjoqnsib bu toqoŋ na aqa gateq di qaloqnsib miselyoqnsib aqa areq di siŋga pulutoqnsib gisaŋyoqnsib biŋiyoqneb. 20Naŋgi degsib Yesus misiliŋyosib koboonaqa gara lent di piqtetosib aqa segi gara jugo qaji di olo jigetosib aqa qawarq di aqa segi ŋamburbas atetosib a baŋ ojsib qamqajqa osi gileb.

Naŋgi Yesus osi gilsib ŋamburbasq di qameb

21A osi giloqnsibqa gamq dia tamo bei walwelosiq Jerusalem qureq aieqnaqa a turosib ojsib Yesus aqa qawarq dena ŋamburbas yaiyosib tamo di yonabqa a kamba qoboiyosiqa Yesus gam na dauryosiq giloqnej. Tamo di aqa ñam Saimon. A Sairini qure qaji. A Aleksander wo Rufus wo naŋgo siqali.

22Naŋgi Yesus osi gilsib sawa agu kiñala bei aqa ñam Golgota di branteb. Ñam di aqa damu, “Tamo gate tanu.” 23Di brantosib qaja tamo naŋgi na wain ya ti kial aqa ya isa koba de ti bulyosib Yesus anaiyonab uyo oneiyonaq ugeiyonaq uratej. 24Onaqa qaja tamo naŋgi na Yesus osib ŋamburbasq di qameb. Qamsib Yesus aqa gara eleŋqa marsib gilteleŋeb. Gilteleŋosib meniŋ silali alaŋeb. Tamo yai aqa meniŋ na buŋnjrqas a na gara oqas. Degsib marsib meniŋ silali alaŋosib gara eleŋeb.

25Seŋ bati 9 onaqa nobqolo naŋgi Yesus ŋamburbasq di qameb. 26Qamsib ŋam sarqei bei osib quraq di anjam endegsib neŋgreŋyeb, “Tamo endi a Juda naŋgo Mandor Koba.” Degsib neŋgreŋyosib ŋam sarqei di osib Yesus aqa ŋamburbas mutu gogeq di qameb. Osib mareb, “Yesus aqa une agi a marqo, ‘E Juda naŋgo Mandor Koba.’ A degsi marqo deqa anjam di agi ŋamburbas mutu gogeq di qamonum.” 27Bati deqa bajiŋ tamo aiyel dego ŋamburbasq di gaintnjrsib ñumeb. Bei Yesus aqa baŋ woq di qameb. Bei Yesus aqa baŋ qonaŋq di qameb. 28Naŋgi kumbra di yeb deqa Qotei aqa anjam bei nami neŋgreŋyeb qaji di aqa damu brantej. Agi endegsib neŋgreŋyeb, “Tamo uŋgasari naŋgi Kristus unsib marqab, ‘A dego une tamo. Deqa a une tamo ti gaiŋesqab.’”

29Ariya Yesus a ŋamburbas goge di gaiŋesonaqa tamo uŋgasari naŋgi aqa ulatamuq dena walwelosib gile beoqnsib a misiliŋyoqnsibqa gate gaiŋyoqnsib minjoqneb, “Ni nami marem, ‘E atra tal koba koŋgrontosiyqa bati qalub qa olo tigeltqai.’ Ni nami degsi marem. 30Ino anjam di boleamqa ni ino segi jejamu aqaryaiyosim ŋamburbas uratosim mandamq aie.” 31Atra tamo kokba ti dal anjam qalie tamo naŋgi ti dego Yesus degsib misiliŋyoqneb. Osib segi segi maroqneb, “A na tamo uŋgasari gargekoba aqaryainjroqnej. Ariya a na aqa segi jejamu aqaryaiyqa keresai. 32A mareqnu, ‘E segi Kristus. E Israel naŋgo Mandor Koba.’ Aqa anjam di boleamqa a na aqa segi jejamu aqaryaiyosim ŋamburbas uratosim mandamq aiimqa iga unsim marqom, ‘Bole.’” Onaqa bajiŋ tamo aiyel Yesus aqa areq di gaintnjreb qaji naŋgi dego Yesus degsib misiliŋ anjam minjoqneb.

Yesus a moiej

33Ariya qanam jige seŋ bati 12 onaqa sawa kalil tulaŋ ambruosi sonaq sonaq gilsiq seŋ bati 3 onaq bilaqtej. 34Onaqa Yesus a tulaŋ koba leleŋosiq marej, “Eloi, Eloi, lama sabaktani?” Di Hibru anjam. Anjam di aqa damu, “O ijo Qotei. O ijo Qotei. Ni kiyaqa e qoreibonum?” 35Onaqa tamo qudei Yesus aqa areq di tigelesoqneb qaji naŋgi aqa anjam di qusib mareb, “Niŋgi quiye. A Elaija meteqnu.” 36Degsi marnabqa tamo bei a urur ti gilsiq gara ñeŋgi bei osiq wain isa kobaq di tuqtosiqa soruq di qosisiqa osi bosiqa Yesus anaiyqajqa soqtosiqa aqa medabuq di atej. Osiqa marej, “Iga mati tariŋosim koqyesqom. Elaija a bosim Yesus ŋamburbasq dena osim mandamq atqas kio?” 37Degsi marnaqa naŋgi tariŋosi sonabqa Yesus a olo tulaŋ koba leleŋej. Osiqa mondor titosiq aqa ŋambile uratosiq moiej.

38Onaqa bati qujai deqa gara kobaquja atra tal miligiq di gaiŋesoqnej qaji a goge na braŋosiq aisiq poaiyelej. 39Yesus a degsi mondor titosiq moiej deqa qaja tamo naŋgo gate koba Yesus aqa areq di tigelesoqnej qaji a na unsiqa marej, “Bole. Tamo endi a Qotei aqa Ŋiri.”

40Ariya Yesus a ŋamburbasq di moinaqa uŋgasari qudei naŋgi isaq di tigelesosib Yesus koqyesoqneb. Bei Maria Makdala qure qaji. Maria bei agi Jems yala wo Joses wo naŋgo ani. Uŋa bei Salome. 41Yesus a nami Galili sawaq di sonaqa uŋgasari naŋgi di a daurysib laqnsib kaŋgalyoqneb. Bunuqna Yesus a Galili sawa uratosiqa a na naŋgi qalub uŋgasari qudei ti joqsiqa naŋgi koba na Jerusalem beleŋeb.

Josep a na Yesus aqa jejamu osiq subq atej

42Ariya Juda naŋgo yori bati brantqa laqnaqa yori bati aqa iŋgi iŋgi kalil gereiyosib atnab soqnej. 43Onaqa bilaqtonaqa tamo bei aqa ñam Josep a Yesus aqa jejamu osim subq atqa marsiqa Pailat a nenemyqa gilej. Josep a Juda naŋgo gate bei. A Arimatea qure qaji. Aqa kumbra tulaŋ boledamu. Deqa tamo uŋgasari kalil naŋgi a qa maroqneb, “A tamo bolequja.” A endegsi are qaloqnej, “Diŋo bati qa Qotei a bosim gago Mandor Koba sqas.” A degsi are qaloqnsiq diŋo bati brantqajqa deqa tariŋosiq soqnej. Ariya Josep a Pailat aqa talq gilsiqa aqa areq di tigelej. A ulaosai. Osiqa Pailat nenemyej, “Ni e odbimqa e Yesus aqa jejamu osiy subq atqa kere e?” 44Onaqa Pailat a tulaŋ prugugetosiq marej, “Yesus a urur moiqo e?” Osiqa qaja tamo naŋgo gate koba a metonaq bonaq nenemyej, “Yesus a bole moiqo e?” 45Onaqa minjej, “Od, a moiqo.” Onaqa Pailat a anjam di qusiqa Josep odyosiq minjej, “Di kere. Ni Yesus aqa jejamu am. Osim subq ate.” 46Onaqa Josep a gilsiqa gara qat awaiyosiqa Yesus aqa jejamu ŋamburbasq dena osiqa gara qat na dalaosiq osi gilej. Osi gilsiqa sub bei nami meniŋ miligiq di gereiyeb qaji dia atsiqa meniŋ kobaquja belbeltosiq sub me getentej. 47Josep na Yesus sub ateqnaqa Maria Makdala qure qaji naŋgi Maria bei agi Joses aqa ani wo bosib koqyesoqneb.